रिक्षाचालकावर चाकू हल्ला; रांजणगाव परिसरात खळबळ

छत्रपती संभाजीनगर (गंगापूर तालुका) : रांजणगाव येथील साई हॉटेल समोर किरकोळ वादातून रिक्षाचालकावर चाकू हल्ला झाल्याची धक्कादायक घटना 15 एप्रिल रोजी सायंकाळी साडेपाचच्या सुमारास घडली. या घटनेत उत्तम भागोजी लोहकरे (वय 50) हे जखमी झाले असून त्यांच्यावर घाटी रुग्णालयात उपचार करण्यात आले.

मिळालेल्या माहितीनुसार, लोहकरे यांचा मुलगा उमेश लोहकरे हा रिक्षा घेऊन उभा असताना आरोपी सोनू सिरसाट (रा. हरिओम नगर) व त्याच्या सोबत असलेल्या दोन जणांनी विनाकारण वाद घालत मारहाण केली. यावेळी उमेशने वडिलांना फोन करून माहिती दिली.

घटनास्थळी पोहोचलेल्या उत्तम लोहकरे यांनी वादाचे कारण विचारले असता आरोपींपैकी एका अनोळखी इसमाने त्यांच्या डोक्यावर चाकूने वार करून जखमी केले. तसेच “तू रोज रस्त्यावर असतोस, उद्या तुला बघून घेऊ” अशी धमकीही दिली. यावेळी लोहकरे यांचे मित्र रामदास नानवटे हे भांडण सोडवण्यासाठी आले असता त्यांनाही लाकडी फळीने मारहाण करण्यात आली.

जखमी अवस्थेत लोहकरे यांना तातडीने पोलीस स्टेशनमध्ये आणण्यात आले, त्यानंतर पोलिसांनी त्यांना घाटी रुग्णालयात उपचारासाठी पाठवले.

या प्रकरणी आरोपी सोनू सिरसाट व इतर दोघांविरुद्ध मारहाण, चाकू हल्ला व धमकी दिल्याप्रकरणी गुन्हा दाखल करण्यात आला असून पुढील तपास पोलीस करत आहेत.

……..