छत्रपती संभाजीनगरमध्ये ‘क्लिफ ऑल डे डायनिंग’चा अन्न परवाना निलंबित; FDA ची कडक कारवाई

NEWS MARATHWADA | SANDEEP LOKHANDE

छत्रपती संभाजीनगर : अन्न सुरक्षेच्या नियमांचे उल्लंघन आणि ग्राहकांच्या आरोग्याला धोका निर्माण होण्याची शक्यता लक्षात घेऊन अन्न व औषध प्रशासनाने (FDA) शहरातील सातारा परिसरातील चाटे स्कूल रोड येथील ‘मे. क्लिफ ऑल डे डायनिंग बेस्पोक हॉस्पिटॅलिटी एलएलपी’ या हॉटेलचा अन्न परवाना तात्काळ प्रभावाने निलंबित केला आहे. Safe Food Safe Maharashtra मोहिमेअंतर्गत ही कारवाई करण्यात आली असून, प्रशासनाच्या आदेशानुसार हॉटेलमधील अन्न उत्पादन, प्रक्रिया, विक्री आणि ग्राहकांना अन्नसेवा देणे बंद करण्याचे निर्देश देण्यात आले आहेत.

अन्न सुरक्षा अधिकारी पी. एस. कुचेकर यांनी ६ तारखेला हॉटेलची अचानक तपासणी केली होती. या तपासणीदरम्यान स्वच्छता आणि अन्न सुरक्षेबाबत अनेक गंभीर त्रुटी आढळून आल्या. तपासणी अहवालात हॉटेलला १०६ पैकी केवळ ४८ गुण, म्हणजेच ४६ टक्के गुण मिळाले. अंतिम निष्कर्षात आस्थापनेची स्थिती ‘अनुपालन नाही’ (Non-Compliance) अशी नोंदवण्यात आली.

तपासणीमध्ये हॉटेल परिसरात अस्वच्छता, कीटक प्रतिबंधक उपायांचा अभाव आणि खिडक्या उघड्या असल्यामुळे कीटकांचा प्रादुर्भाव होण्याची शक्यता आढळली. तसेच कच्चे आणि शिजवलेले अन्न, शाकाहारी आणि मांसाहारी पदार्थ वेगवेगळे ठेवण्याच्या नियमांचे पालन झाले नसल्याचे नमूद करण्यात आले. हॉटेलमध्ये वापरल्या जाणाऱ्या पाण्याच्या सुरक्षिततेबाबत आवश्यक चाचणी अहवाल किंवा दस्तऐवजी पुरावाही उपलब्ध नव्हता. याशिवाय, अन्न हाताळणारे कर्मचारी आणि वेटर आवश्यक एप्रन, हातमोजे व शिरोवस्त्र वापरत नसल्याचे आढळले. अन्नपदार्थांचे शीतकरण आणि तापमान नियंत्रण, वायुवीजन, वापरलेल्या खाद्यतेलाची पडताळणी तसेच कचरा व्यवस्थापन यामध्येही त्रुटी आढळून आल्या. या त्रुटींमुळे अन्न दूषित होऊन ग्राहकांच्या आरोग्याला धोका निर्माण होऊ शकतो, असे प्रशासनाच्या कारवाईत नमूद करण्यात आले आहे. सहाय्यक आयुक्त (अन्न), परिमंडळ-२, द. वि. पाटील यांनी अन्न सुरक्षा व मानके अधिनियम, २००६ अंतर्गत परवाना निलंबनाचे आदेश जारी केले आहेत. हॉटेल व्यवस्थापनाने सर्व त्रुटी दूर करून अधिकृत पुनर्तपासणी करून घेणे आवश्यक आहे. तसेच प्रशासनाचा पुढील लेखी आदेश मिळेपर्यंत अन्न व्यवसाय पुन्हा सुरू करू नये, असे निर्देश देण्यात आले आहेत.

सार्वजनिक आरोग्याशी संबंधित नियमांचे उल्लंघन करणाऱ्या आस्थापनांविरुद्ध यापुढेही कठोर कारवाई सुरू राहील, अशी माहिती सहआयुक्त श्रीकांत करकळे यांनी दिली.