महिलेचे मंगळसूत्र हिसकावले; वाळूज महानगरातील धक्कादायक घटना

वाळूज महानगर : परिसरात गुन्हेगारीच्या घटनांमध्ये वाढ होत असल्याचे पुन्हा एकदा समोर आले आहे. मंगळवारी (दि. १७) रात्री सुमारे ११ वाजण्याच्या सुमारास जेवणानंतर शतपावली करत असलेल्या महिलेचे मंगळसूत्र हिसकावल्याची घटना घडली.

सुमन बंडू राठोड (रा. सारा वृंदावन, वाळूज महानगर १) असे पीडित महिलेचे नाव असून, त्या त्यांच्या पुतणी शीतल सुभाष राठोड यांच्यासोबत शतपावली करत होत्या. या दोघी शिवाजी महाराज चौकाकडून आर्किड शाळेकडे जात असताना वळण घेऊन पुन्हा चौकात येत असताना, विरुद्ध दिशेने दुचाकीवर आलेल्या दोन अज्ञात इसमांनी त्यांच्या गळ्यातील सुमारे दीड तोळ्याचे मंगळसूत्र हिसकावले.

यावेळी झालेल्या झटापटीत सुमन राठोड यांनी प्रसंगावधान राखत मंगळसूत्राचा काही भाग वाचवला. मात्र सुमारे २.५ ग्रॅम सोन्याचा भाग चोरट्यांनी लंपास केला. घटनेनंतर त्यांनी तत्काळ ११२ या आपत्कालीन क्रमांकावर संपर्क साधत वाळूज एमआयडीसी पोलिसांना माहिती दिली.

या प्रकरणी पोलिसांनी घटनास्थळी धाव घेत तपास सुरू केला असून, परिसरातील सीसीटीव्ही फुटेजच्या आधारे आरोपींचा शोध सुरू आहे. दरम्यान, या घटनेमुळे परिसरात भीतीचे वातावरण निर्माण झाले आहे.

॰॰॰॰