गाधीत गुंडाळून २० वर्षीय तरुणीचा मृतदेह नेत असताना पोलिसांनी आडवले; घातपाताचा संशय

वाळूज महानगर (प्रतिनिधी) : वाळूज महानगर परिसरात एक धक्कादायक घटना उघडकीस आली आहे. वडगाव कोल्हाटी येथील साबळे कुटुंब गावी जात असताना तिसगाव चौफुली येथे त्यांच्या गाधीत संशयास्पदरीत्या काहीतरी गुंडाळले असल्याची माहिती पोलिसांना मिळाली.

माहिती मिळताच पोलिसांनी तात्काळ घटनास्थळी धाव घेत गाधीची तपासणी केली. गाधी उघडून पाहिले असता त्यामध्ये २० वर्षीय तरुणीचा मृतदेह आढळून आला. या प्रकारामुळे परिसरात एकच खळबळ उडाली.

पोलिसांनी अधिक चौकशी केली असता संबंधित तरुणीच्या सावत्र आई-वडिलांनी, “मुलीने गळफास घेतला असून तिचा मृतदेह गावाकडे अंत्यसंस्कारासाठी घेऊन जात होतो,” अशी माहिती दिली. मात्र, परिस्थिती संशयास्पद वाटत असल्याने पोलिसांनी मृतदेह तातडीने घाटी रुग्णालयात पाठवून शवविच्छेदनासाठी ठेवला आहे.

दरम्यान, पुढील तपासासाठी सावत्र आई-वडिलांना ताब्यात घेण्यात आले असून मृत्यूचे नेमके कारण शवविच्छेदन अहवालानंतर स्पष्ट होणार आहे. या घटनेमुळे वाळूज महानगर परिसरात मोठी चर्चा रंगली आहे.

पोलिस तपास सुरू आहे.

•••••