module: NormalModule; touch: (-1.0, -1.0); modeInfo: ; sceneMode: Auto; cct_value: 0; AI_Scene: (-1, -1); aec_lux: 128.0;
बजाजनगर – न्यूज मराठवाडा ब्युरो
कामगार तसेच उद्योजकांची प्रमुख रहिवासी वसाहत असलेल्या बजाजनगर परिसरात सध्या मोकाट जनावरांचा उपद्रव मोठ्या प्रमाणात वाढला आहे. या मोकाट जनावरांच्या मुक्त संचारामुळे नागरिकांना रस्त्यांवरून प्रवास करताना जिवाची भीती वाटू लागली आहे. विशेषतः सकाळी व संध्याकाळच्या गर्दीच्या वेळात, मुख्य रस्त्यावर कळपाच्या स्वरूपात उभ्या असलेल्या जनावरांमुळे वाहतूक कोंडी होत असून अपघाताचे प्रमाणही वाढण्याची शक्यता निर्माण झाली आहे.
स्थानिक नागरिकांनी दिलेल्या माहितीनुसार, बजाजनगर परिसरात अनेक वेळा मोकाट जनावरे रस्त्याच्या मधोमध उभी राहत असून, दुचाकीस्वार तसेच पादचाऱ्यांना त्यामधून वाट काढणे अत्यंत धोकादायक बनले आहे. काही प्रकरणांमध्ये जनावरांनी नागरिकांवर झडप घालण्याचे प्रकारही घडले असून, सुदैवाने जीवितहानी टळली आहे. मात्र भविष्यात या प्रकारामुळे गंभीर किंवा जीवघेणी घटना घडण्याची शक्यता नाकारता येत नाही.
स्थानिक ग्रामपंचायत व प्रशासनाकडे वारंवार तक्रारी करूनही अद्याप ठोस उपाययोजना करण्यात आलेली नाही, अशी तक्रार नागरिकांकडून होत आहे. बजाजनगरात मोठ्या प्रमाणावर औद्योगिक कामगार आणि त्यांच्या कुटुंबियांचे वास्तव्य असल्याने, येथील रस्ते आणि परिसर सुरक्षित ठेवणे ही प्रशासनाची जबाबदारी आहे, असा सूर नागरिकांमध्ये उमटत आहे.
या पार्श्वभूमीवर बजाजनगरमधील नागरिकांनी वडगाव कोल्हाटी ग्रामपंचायत तसेच जिल्हा प्रशासनाकडे मागणी केली आहे की, मोकाट जनावरांचे संकलन करून त्यांच्या देखभालीसाठी योग्य व्यवस्था करण्यात यावी. तसेच या समस्येकडे गांभीर्याने पाहून तातडीने कारवाई करण्यात यावी, अन्यथा आंदोलनाचा इशाराही काही नागरिकांनी दिला आहे.
