मध्यरात्री रिक्षाला भीषण अपघात; रिक्षाचालकासह महिला प्रवाशाचा मृत्यू, दोन महिला गंभीर

न्यूज मराठवाडा वृत्तसेवा (संदीप लोखंडे)

वाळूज महानगर : रेल्वे स्टेशन परिसरातून रांजणगाव शेपू येथे येत असलेल्या एका रिक्षाला गोलवाडी फाटा येथे मध्यरात्री भीषण अपघात झाला. रस्त्यालगत उभ्या असलेल्या पिकअप वाहनाला रिक्षा जोरात धडकल्याने या अपघातात रिक्षाचालकासह एका महिला प्रवाशाचा जागीच मृत्यू, तर दोन महिला गंभीर जखमी झाल्या आहेत. ही घटना दि. ३ फेब्रुवारी रोजी रात्री सुमारे १.३० वाजण्याच्या सुमारास घडली.

या अपघातात रिक्षाचालक रईस हाशिम शेख (वय ३५, रा. रांजणगाव शेपू) व प्रवासी महिला रुखमिनी येणगे (वय ४५) यांचा जागीच मृत्यू झाला. तर शीतल मोरे (वय २४) व पायल वरदे (वय १९), दोघीही शिवनेरी कॉलोनी, रांजणगाव शेपू, ता. छत्रपती संभाजीनगर येथील रहिवासी असून त्या गंभीर जखमी झाल्या आहेत.

अपघात इतका भीषण होता की रिक्षाचा अक्षरशः चुराडा झाला. रिक्षामध्ये अडकलेल्या जखमी महिलांना बाहेर काढण्यासाठी कटरच्या सहाय्याने रिक्षा कापावी लागली. घटनेची माहिती मिळताच पदमपुरा येथील अग्निशमन दलाचे जवान तातडीने घटनास्थळी दाखल झाले व त्यांनी जखमींना बाहेर काढून तात्काळ उपचारासाठी रुग्णालयात दाखल केले.

दरम्यान, या अपघातामुळे परिसरात काही काळ हळहळ व्यक्त करण्यात येत होती. घटनेची नोंद संबंधित पोलीस ठाण्यात करण्यात आली असून पुढील तपास सुरू आहे.

॰॰॰॰