बजाजनगरात पैशांच्या वादातून तरुणावर जीवघेणा हल्ला; बेल्ट आणि लोखंडी वस्तूने मारहाण

न्यूज मराठवाडा वृत्तसेवा :

छत्रपती संभाजीनगर : वाळूज एमआयडीसी परिसरातील बजाजनगर येथे पैशांच्या वादातून एका तरुणावर बेल्ट व लोखंडी वस्तूने हल्ला केल्याची धक्कादायक घटना समोर आली आहे. या प्रकरणी एमआयडीसी वाळूज पोलीस ठाण्यात गुन्हा दाखल करण्यात आला आहे.

पोलिसांकडून मिळालेल्या माहितीनुसार, फिर्यादी टिंगु ललन यादव (वय 32, रा. हनुमाननगर, रांजणगाव, ता. गंगापूर) हे आपल्या रूम पार्टनरकडून भाड्याचे व उसने दिलेले पैसे घेण्यासाठी 26 मार्च रोजी सकाळी सुमारे 10.30 वाजता बजाजनगर येथील मोहटादेवी मंदिरासमोर गेले होते.
यावेळी आरोपी गणेश बाबासाहेब खेडकर (रा. हनुमाननगर, रांजणगाव) याने पैसे नसल्याचे सांगत संतापाच्या भरात फिर्यादीला कमरेच्या चामडी बेल्टने बेदम मारहाण केली. तसेच शिवीगाळ करत त्याच्या मित्रानेही हाताने मारहाण केली.
इतक्यावरच न थांबता, आरोपी गणेश खेडकर याने हातातील लोखंडी वस्तूने फिर्यादीच्या डोक्यात प्रहार करून त्याला गंभीर जखमी केले. या घटनेमुळे परिसरात काही काळ तणावाचे वातावरण निर्माण झाले होते.
या प्रकरणी एमआयडीसी वाळूज पोलीस ठाण्यात गुन्हा गुन्हा दाखल करण्यात आला आहे. या घटनेमुळे छोट्या पैशांच्या वादातून वाढणाऱ्या गुन्हेगारी प्रवृत्तीबद्दल पुन्हा एकदा चिंता व्यक्त केली जात आहे.