खुनाचा संशय; युवकाचा मृत्यू अपघात की खून याचा पोलिस तपास सुरू

Total Views: 195

न्यूज मराठवाडा वृत्तसेवा ( संदीप लोखंडे )

वाळूज महानगर : जोगेश्वरी गावाजवळील तलावात एका तरुणाचा मृत्यू झाल्याची घटना उघडकीस आली असून हा प्रकार अपघात आहे की खून याबाबत पोलिस तपास सुरू आहे.

पोलिसांकडून मिळालेल्या माहितीनुसार, मृताचे नाव ज्ञानेश्वर मनोहर जाधव (वय 28, रा. श्रद्धा कॉलनी, वाळुज, ता. गंगापूर, जि. छत्रपती संभाजीनगर) असे आहे. दि. 21 ऑगस्ट रोजी दुपारी साडेतीनच्या सुमारास ज्ञानेश्वर हा जोगेश्वरी गावाजवळील तलावाच्या पाण्यात बुडाला. त्यास नागरिकांनी घाटी रुग्णालय, छत्रपती संभाजीनगर येथे उपचारासाठी आणले.

रुग्णालयातील अपघात विभागात दाखल केल्यानंतर तपासणीदरम्यान डॉक्टरांनी ज्ञानेश्वरला संध्याकाळी 5.15 वाजता मृत घोषित केले.

या घटनेची माहिती एस.आर. खिल्लारी, बेगमपुरा पोलीस ठाणे हद्दीत येणाऱ्या घाटी मेडिकल पोलीस चौकीतून पोलिसांना देण्यात आली. पुढील तपास अंमलदार उदे हे करीत आहे.

या मृत्यूमागे तलावात बुडून अपघाती मृत्यू झाला की यामागे अन्य काही कारण असून खून तर नाही ना, याबाबतचा तपास पोलिसांकडून सुरू असल्याची माहिती समजते.