चाकूचा धाक दाखवून लुट करणारे रांजणगावातील दोन लुटारू पोलिसांच्या ताब्यात; ४९ हजारांचा मुद्देमाल जप्त

Total Views: 96

न्यूज मराठवाडा वृत्तसेवा – संदीप लोखंडे

वाळूज महानगर : छत्रपती संभाजीनगरच्या वाळूज औद्योगिक परिसरात दिवाळीनिमित्त कामगारांना कंपन्यांकडून वेतन व बोनस मिळाले, याचा फायदा घेत, दि १९ ऑक्टबर रोजी कोलगेट चौकात एका कामगाराला चाकूचा धाक दाखवून लुटणाऱ्या दोन लुटारूंना वाळूज एमआयडीसी पोलिसांनी अवघ्या काही तासांत पकडण्यात यश मिळवले आहे. पोलिसांनी आरोपींकडून ४९ हजार रुपयांचा मुद्देमाल जप्त केला आहे.

मिळालेल्या माहितीनुसार, दिनांक १९ ऑक्टोबर रोजी कोलगेट चौकात दोन अनोळखी लुटारूंनी एका कामगाराला चाकूचा धाक दाखवून ८ हजार रुपये लुटले होते. या प्रकरणी वाळूज एमआयडीसी पोलीस ठाण्यात गुन्हा दाखल करण्यात आला होता.

तपासादरम्यान पोलिसांना माहिती मिळाली की आरोपी बीकेटी कंपनीजवळ थांबलेले आहेत. त्यानुसार विशेष पथकाने सापळा रचून आरोपींना अटक केली. अटक करण्यात आलेल्या आरोपींची नावे —

कृष्णा भास्कर चक्रे (वय ३०, व्यवसाय मजुरी) आणि गजानन फकीरा जाधव (वय ३२, व्यवसाय मजुरी, रा. ओम साई नगर, कमलापूर रोड, रांजणगाव, ता. गंगापूर, जि. छत्रपती संभाजीनगर) अशी आहेत.

त्यांच्याकडून पोलिसांनी एक दुचाकी, रोख रक्कम आणि इतर साहित्य असा एकूण ४९ हजार रुपयांचा मुद्देमाल जप्त केला आहे. दोन्ही आरोपींवर वाळूज एमआयडीसी, छावणी आणि वेदांत नगर पोलीस ठाण्यांमध्ये यापूर्वीही गुन्हे दाखल असल्याचे समोर आले आहे. अजून काही गुन्हे उघड होण्याची शक्यता पोलिसांनी वर्तवली आहे.

ही कारवाई वरिष्ठ पोलीस निरीक्षक रामेश्वर गाडे यांच्या मार्गदर्शनाखाली पोलीस उपनिरीक्षक प्रवीण पाथरकर, दिनेश बन, आमदार धीरज काबलिये, जालिंदर रंधे, सुरेश कचे, हनुमान ठोके, दीपक जाधव, सुरेश भिसे, वैभव गायकवाड, रवींद्र गायकवाड, शिवनारायण नागरे, जयेश साळुंखे, सचिन ठोकळ, संतोष बमनाथ, संदीप तागड, बाळासाहेब आंधळे आणि राजाभाऊ कोल्हे यांच्या पथकाने केली.

या कारवाईमुळे वाळूज परिसरात निर्माण झालेल्या दहशतीला आळा बसला असून, पोलिसांच्या तत्पर कारवाईचे सर्वत्र कौतुक होत आहे..