Screenshot
वाळूज महानगर ( संदीप लोखंडे )
वाळूज महानगर १ भागात कचऱ्याच्या वाढत्या समस्येमुळे प्रशासनासह स्थानिक नागरिक देखील त्रस्त झाले आहेत. दुर्गंधी आणि सार्वजनिक आरोग्यावर होणाऱ्या परिणामामुळे आता नागरिकांनीच पुढाकार घेत कचरा मुक्तीचा निर्धार केला आहे.
गेल्या काही दिवसांपासून परिसरात उघड्यावर कचरा टाकण्याचे प्रमाण वाढले होते. त्यामुळे वाळूज महानगर १ मधील सोसायटी पदाधिकाऱ्यांनी एकत्र येत रात्री जागरण केले. या मोहिमेत त्यांनी सुमारे ३० ते ४० नागरिकांना कचरा रस्त्यावर टाकण्यापासून रोखले. ही नागरिकांची भूमिका निश्चितच प्रशंसनीय आहे.
मात्र, या मोहिमेदरम्यान एक धक्कादायक प्रकार घडला. वडगाव गावातून बाबा चिकन शॉप या चिकन व्यावसायिकाच्या कामगारांनी रिक्षा (क्रमांक एम एच २० बीटी ९२२२) मध्ये चिकनचे वेस्टेज आणि मांसाचे तुकडे भरलेले ड्रम घेऊन या परिसरात फेकण्यासाठी आले होते. सतर्क नागरिकांनी वेळेवर हस्तक्षेप करत या वाहनाला अडवले आणि संबंधित व्यावसायिकांना चांगलीच खरडपट्टी काढली.
यावेळी संतप्त नागरिकांनी संबंधित वाहन जप्त करून त्यावर दंडात्मक कारवाई करण्याची मागणी प्रशासनाकडे केली आहे. कचऱ्याचा प्रश्न सोडवण्यासाठी नागरिकांनी दाखवलेला सजगपणा उल्लेखनीय आहे. प्रशासनानेही या प्रकरणाची गंभीर दखल घेत योग्य ती कायदेशीर कारवाई करावी, अशी अपेक्षा व्यक्त होत आहे.
या घटनेनंतर परिसरात कचऱ्यावरून सुरु असलेला संघर्ष नव्या टप्प्यात गेला आहे. आता प्रशासन चिकन व्यावसायिकांवर कोणती कारवाई करते, हे पाहणे औत्सुक्याचे ठरणार आहे.
दरम्यान सिडको वाळूज महानगर – १ मधील दत्ता वर्पे, संजय संभाळकर, संदीप लोखंडे, सुशील शिंदे, जनार्दन चिल्लारे, भाऊसाहेब गवते, संजय भालेराव, अंकुश माळवदे, एकनाथ ठोंबरे या नागरिकांनी रात्रीचा खडा पहारा सुरु केला असून , रात्री पकडण्यात आलेल्या चिकन व्यावसायिकाच्या रिक्षाची माहिती सिडकोच्या सहाय्यक वसाहत अधिकारी स्वाती पाटील यांना देण्यात आली. त्यांनी कोणाचीही गय केली जाणार नसून, दंड आकारून वाहन जप्तीचीही कारवाई केली जाईल असा इशारा दिला. हा रात्रीचा खडा पहारा सुरूच राहणार असल्याचे नागरिकांनी सांगितले.
