सोनाराच्या दुकानात नाणे खरेदीसाठी गेलेल्या व्यक्तीने ७ तोळे सोने केले लंपास

छत्रपती संभाजीनगर : छत्रपती संभाजीनगरातील जयभवानीनगरात असलेल्या एका सोनाराच्या दुकानात वास्तुशांतीसाठी 300 रुपयांचे चांदीचे नाणे खरेदीचा बहाणा करत चोरट्याने हातचलाखी केली आहे. अवघ्या 5 सेकंदात 7 तोळे 2 ग्राम सोन्याच्या दागिन्यांचे पाकीट लंपास केले आहे. जय भवानीनगरातील गल्ली नंबर 3 येथे हा प्रकार घडला असून याप्रकरणी मुकुंदवाडी पोलीस ठाण्यात गुन्हा दाखल करण्यात आला आहे. रोहित भारते यांनी फिर्याद यासंदर्भात दिली असून हेल्मेट घालून आलेल्या व्यक्तीने स्वतःची ओळख लपवत चोरी केल्याचे सीसीटीव्ही कॅमेऱ्यात कैद झाले असून पोलीस आता या हातचालाखी करणाऱ्या आरोपीचा शोध घेत आहेत.