घराच्या दुसऱ्या मजल्यावरून उडी मारून महिलेची आत्महत्या

वाळूज : घराच्या दुसऱ्या मजल्यावरून उडी मारून एका महिलेने आत्महत्या केल्याची घटना वाळूजजवळील बकवाल नगर येथे बुधवारी (६ मे) सकाळी सुमारे १० वाजण्याच्या सुमारास घडली.

पोलिसांकडून मिळालेल्या माहितीनुसार, बकवाल नगर येथील रहिवासी भगवान काकडे यांच्या घराच्या दुसऱ्या मजल्यावरून विवाहित योगिता गणेश सावंत (वय ३४) यांनी खाली उडी घेतली. रागाच्या भरात त्यांनी ही उडी मारल्याची प्राथमिक माहिती समोर आली आहे. या घटनेत त्या गंभीर जखमी झाल्या.

सिद्धेश्वर गिरी व भगवान काकडे यांनी त्यांना तातडीने घाटी रुग्णालयात दाखल केले. मात्र, उपचारापूर्वीच त्यांनी प्राण सोडले होते. डॉक्टरांनी तपासणी करून त्यांना मृत घोषित केले.

या प्रकरणी वाळूज पोलीस ठाण्यात नोंद करण्यात आली असून पुढील तपास सुरू आहे.
….