गॅस टंचाईचा मोठा फटका; वाळूज महानगरात सिलेंडरसाठी नागरिकांची वणवण

घरगुती गॅसचा पुरवठा विस्कळीत; तासन्‌तास रांगा, नागरिक त्रस्त

न्यूज मराठवाडा वृत्तसेवा: अनिकेत घोडके

वाळूज महानगर : वाळूज महानगर परिसरात घरगुती एलपीजी गॅस सिलेंडरची टंचाई निर्माण झाल्याने नागरिकांना मोठा त्रास सहन करावा लागत आहे. गेल्या काही दिवसांपासून गॅसचा पुरवठा वेळेवर होत नसल्याने अनेक ठिकाणी नागरिकांना सिलेंडरसाठी अक्षरशः वणवण करावी लागत आहे.

गॅस एजन्सींमध्ये सिलेंडर मिळवण्यासाठी सकाळपासूनच नागरिकांच्या लांबच लांब रांगा लागलेल्या दिसत आहेत. अनेकांनी ऑनलाईन बुकिंग करूनही वेळेवर सिलेंडर मिळत नसल्याची तक्रार केली आहे. काही ठिकाणी दोन-तीन दिवसांपासून सिलेंडरचा पुरवठा न झाल्यामुळे नागरिकांमध्ये नाराजी व्यक्त होत आहे. घरगुती वापरासाठी गॅस उपलब्ध नसल्याने अनेक कुटुंबांना स्वयंपाक करण्यासाठी पर्यायी साधनांचा वापर करावा लागत आहे. विशेषतः महिला व ज्येष्ठ नागरिकांना याचा मोठा त्रास सहन करावा लागत असल्याचे दिसून येत आहे.
दरम्यान, संबंधित गॅस एजन्सींकडून पुरवठा लवकरच सुरळीत होईल, असे सांगण्यात येत असले तरी नागरिकांना प्रत्यक्षात दिलासा कधी मिळणार याकडे सर्वांचे लक्ष लागले आहे.