नायलॉन मांजामुळे कामगार जखमी; रांजणगाव शेपू येथील घटना

न्यूज मराठवाडा वृत्तसेवा (संदीप लोखंडे)

वाळूज महानगर : बंदी असलेल्या नायलॉन मांजामुळे एका ३८ वर्षीय कामगारास गंभीर दुखापत झाल्याची घटना रांजणगाव शेपू येथे आज बुधवार (दि. १४ जानेवारी) दुपारी घडली. रवी वामन काजळे (३८) (रा. शिवनेरी कॉलनी, रांजणगाव शेपू) असे जखमी कामगाराचे नाव आहे.

रवी काजळे हे दुचाकीवरून कामावरून घरी जात असताना अचानक त्यांच्या चेहऱ्यावर नायलॉन मांजा अडकला. या घटनेत त्यांच्या नाकासह डोळ्याला गंभीर इजा झाली. घटनेनंतर त्यांना तात्काळ उपचारासाठी दवाखान्यात दाखल करण्यात आले असून सध्या त्यांच्यावर उपचार सुरू आहेत.

नायलॉन मांजाच्या वापरावर बंदी असतानाही अशा प्रकारच्या घटना सातत्याने घडत असल्याने नागरिकांच्या सुरक्षेचा प्रश्न ऐरणीवर आला आहे. दुचाकी चालकांनी वाहन सावकाश चालवावे तसेच नायलॉन मांजापासून स्वतःची सुरक्षितता राखण्याचे आवाहन नागरिकांकडून करण्यात येत आहे. संबंधित यंत्रणांनी याबाबत कठोर कारवाई करावी, अशी मागणीही नागरिकांनी केली आहे.

॰॰॰॰