न्यूज मराठवाडा वृत्तसेवा / वाळूज महानगर
छत्रपती संभाजीनगर शहर पोलिसांच्या छावणी विभागाच्या पथकाने रविवारी सायंकाळी साजापूर शिवारात धुळे–सोलापूर महामार्गालगत असलेल्या एका पत्र्याच्या शेडवर छापा टाकत कुंटणखाना उघडकीस आणला. या कारवाईत तीन महिलांची सुटका करण्यात आली असून पाच जणांना पोलिसांनी ताब्यात घेतले आहे.ही कारवाई सहाय्यक पोलिस आयुक्त संजय सानप यांच्या मार्गदर्शनाखाली करण्यात आली. मिळालेल्या गुप्त माहितीनुसार ही धाड टाकण्यात आली.
🔹 गोपनीय माहितीवरून पोलिसांची धडक कारवाई
छावणी विभागातील पोलिस पथकाला माहिती मिळाली होती की, साजापूर शिवारातील चौधरी टाईल्सच्या मागे असलेल्या पत्र्याच्या शेडमध्ये काही महिलांना ठेवून त्यांच्या इच्छेविरुद्ध ग्राहकांशी शारीरिक संबंध ठेवण्यासाठी भाग पाडले जात आहे. या माहितीची खात्री करून पोलिसांनी बनावट ग्राहक पाठवून सापळा रचला.रात्री सुमारे ८ वाजेच्या सुमारास बनावट ग्राहकाने ठरल्याप्रमाणे व्यवहार निश्चित केला आणि मोबाईलवर संकेत देताच पोलिसांनी धाड टाकली.
🔹 मुख्य आरोपीसह पाच जण पोलिसांच्या जाळ्यात
छाप्यातून सलमान उस्मान संव्यद (वय २५, रा. अयोध्यानगर) हा मुख्य व्यवस्थापक असल्याचे निष्पन्न झाले. संबंधित ठिकाण त्याने शाम मुरलीधर साळुंके (रा. कोलवाडी, कन्नड) याच्याकडून भाडेतत्त्वावर घेतले होते. तसेच संदीप काशिनाथ पवार, ईश्वर बाबू राठोड, शुभम विठ्ठल कायस्थ आणि बाळू शिवाजी रनमळे हे चारजण वेश्यागमनासाठी आलेले असल्याचे तपासात समोर आले.
🔹 महिलांची सुटका व आपत्तीजनक साहित्य जप्त
पोलिसांनी तीन महिलांची सुटका करून त्यांना तात्पुरते सुरक्षित ठिकाणी हलवले आहे. घटनास्थळावरून पोलिसांनी ₹१७,१४० रोख रक्कम, मोबाईल फोन, कंडोम पाकिटे व इतर आपत्तीजनक साहित्य जप्त केले. तपासात असेही निष्पन्न झाले की, ग्राहकांकडून व्यवहारासाठी फोनपे द्वारे पैसे स्वीकारले जात होते.
🔹 ठिकाणाचे स्वरूप व तपासाची दिशा
सदर ठिकाणी सहा खोल्यांचा शेड असून प्रत्येक खोलीत पलंग, गादी आणि टॉयलेट सुविधा उपलब्ध होती. या ठिकाणाहून अनैतिक धंदा सुरु असल्याची पोलिसांना खात्री पटली. या प्रकरणी एमआयडीसी वाळूज पोलिस ठाण्यात गुन्हा दाखल करण्यात आला असून, पुढील तपास सहाय्यक पोलिस आयुक्त संजय सानप यांच्या मार्गदर्शनाखाली सुरू आहे. या कारवाईत पोअं. भरत पवार, नवाब शेख, सचिन नवरंगे, संदीप बोर्ड, गणेश जाधव, आरटीपीसी नागरे आणि चालक पो.उ. जावेद शेख यांनी सहभाग नोंदवला.
