वाळूज एमआयडीसी अतिक्रमण मोहिमेला ब्रेक; दोन दिवसांत १३०० अतिक्रमणे हटवली..

Total Views: 203

📰 न्यूज मराठवाडा वृत्तसेवा | संदीप लोखंडे

📍 वाळूज महानगर

वाळूज एमआयडीसीतील अतिक्रमणविरोधी मोहिमेला दोन दिवसांच्या तडाख्यांनंतर तात्पुरती विश्रांती देण्यात आली आहे. प्रशासनाने या मोहिमेदरम्यान सुमारे १३०० अतिक्रमित बांधकामे हटवत मोठी कारवाई केली आहे.

ही कारवाई बजाजनगर परिसरातील डॉ. बाबासाहेब आंबेडकर चौकापासून सुरू होऊन तनवणी व त्रिमूर्ती शेजारील भागात थांबवण्यात आली. औद्योगिक वसाहतीत मोठ्या प्रमाणावर अतिक्रमण झाल्याने एमआयडीसी प्रशासनाने यावर कडक पावले उचलण्याचा निर्णय घेतला होता.

या मोहिमेत पक्की घरे, पत्र्याचे शेड, व्यावसायिक गाळे, टपऱ्या अशा स्वरूपातील अतिक्रमणे हटवण्यात आली. कारवाईदरम्यान पोलीस बंदोबस्त, जेसीबी यंत्रसामग्री व अधिकाऱ्यांचा मोठा फौजफाटा तैनात करण्यात आला होता.

सध्या मोहिमेला थांबवण्यात आले असले तरी प्रशासनाचा इशारा स्पष्ट आहे — बेकायदेशीर बांधकामे कोणतीही गय न करता पाडली जातील. पुढील टप्प्यात आणखी काही परिसरांवर कारवाई होण्याची शक्यता आहे.

वाळूज एमआयडीसी प्रशासनाचे अतिक्रमणविरोधी पाऊल आता अधिक कठोर व निर्णायक बनले असून, नागरिकांनी स्वेच्छेने अतिक्रमण काढून घेण्याचे आवाहन करण्यात येत आहे.