माधुरी हत्तीणीला परत आणा! — बजाजनगरात उद्या स्वाक्षरी मोहीम

Total Views: 147

न्यूज मराठवाडा वृत्तसेवा
वाळूज महानगर : कोल्हापूर जिल्ह्यातील नंदिनी येथील श्री जिनसेन मठात तब्बल ३५ वर्षांपासून ग्रामस्थांच्या सहवासात राहणारी माधुरी हत्तीण सध्या भावनिक चर्चेचा विषय ठरली आहे. हत्तीणीच्या आरोग्याच्या कारणावरून तिला गुजरातमधील वन तारा येथे हलवण्यात आले आहे. मात्र, या निर्णयाविरोधात नागरिकांमध्ये तीव्र नाराजी व्यक्त होत असून तिच्या पुनःपाठवणीसाठी आता एक मोहीम उभी राहत आहे.

ग्रामस्थांच्या म्हणण्यानुसार, माधुरी हत्तीणीशी त्यांचे जिव्हाळ्याचे नाते होते. त्यामुळे तिचा अचानक झालेला विलगीकरणाचा निर्णय मनाला चटका लावणारा ठरला आहे. विशेष म्हणजे, वन तारा हे ठिकाण अंबानी यांच्या मालकीचे असल्यामुळे ग्रामस्थांनी याविरोधात अनोखी प्रतिक्रिया दिली आहे. त्यांनी मोठ्या प्रमाणावर आपल्या जिओ सिमचे पोर्टिंग अन्य नेटवर्कमध्ये करण्याची मोहीम सुरू केली आहे.

याच पार्श्वभूमीवर, उद्या दि. ३ ऑगस्ट रोजी दुपारी ४ ते ६ वाजेदरम्यान बजाजनगर येथील मोहतदेवी मंदिर परिसरात माधुरी हत्तीणीला परत आणण्याच्या मागणीसाठी स्वाक्षरी मोहीम राबवली जाणार आहे. स्थानिक नागरिक, सामाजिक कार्यकर्ते आणि हत्तीणीप्रेमी मोठ्या संख्येने सहभागी होण्याची अपेक्षा आहे.