मोबाईल न दिल्याच्या रागात १६ वर्षीय तरुणाची आत्महत्या; खावडा डोंगरावरून घेतली उडी, आईने फोडला हंबरडा

Total Views: 319

न्यूज मराठवाडा वृत्तसेवा (संदीप लोखंडे)

वाळूज महानगर – मोबाईल घेऊन दिला नाही, या कारणावरून १६ वर्षीय तरुणाने थेट खावडा डोंगरावरून उडी मारून आत्महत्या केल्याची हृदयद्रावक घटना आज दि. ३ ऑगस्ट रोजी दुपारी उघडकीस आली. या घटनेमुळे परिसरात हळहळ व्यक्त होत आहे.

मृत तरुणाचे नाव अथर्व गोपाल तायडे (वय १६) असून तो मूळचा जळगाव जामोद, जि. बुलढाणा येथील रहिवासी आहे. सध्या तो स्वातिक सिटी, साजापूर शिवार, वाळूज येथे राहत होता. तो पोलीस भरतीचे प्रशिक्षण घेत होता.

आईकडे मोबाईल मागितला, पण तीने नकार दिला. रागाच्या भरात अथर्वने तिसगाव येथील खावडा डोंगरावरून उडी मारली.

ही घटना पाहून परिसरात एकच खळबळ उडाली.

जखमी अवस्थेत असलेल्या अथर्वला अतुल आडे आणि स्वप्नील पवार यांनी तातडीने दवाखान्यात नेले. मात्र, डॉक्टरांनी त्याला मृत घोषित केले.

घटनेनंतर आईने फोडलेला हंबरडा हृदयद्रावक होता. वाळूज एमआयडीसी पोलीस ठाण्याचे पोलीस उपनिरीक्षक सलीम शेख यांच्यासह कर्मचाऱ्यांनी घटनास्थळी भेट देऊन पुढील तपास करत आहे.