मशीनचे ज्ञान नसताना काम लावले; महिलेचा हात गमावला – कंपनी मालकाविरुद्ध गुन्हा

Total Views: 218

📰 न्यूज मराठवाडा वृत्तसेवा | संदीप लोखंडे | वाळूज महानगर

वाळूज औद्योगिक क्षेत्रातील एका कंपनीत मोल्डिंग मशीनवर कामाचे प्रशिक्षण नसलेल्या महिलेला काम लावल्यामुळे तिचा हात गंभीर जखमी होऊन कोपर्यापासून कापावा लागल्याची धक्कादायक घटना घडली आहे. या प्रकरणी संबंधित कंपनी मालकाविरुद्ध वाळूज एमआयडीसी पोलीस ठाण्यात गुन्हा दाखल करण्यात आला आहे.

पूजा गंगाधर पांचाळ (वय २३, रा. विटावा) असे जखमी महिलेचे नाव आहे. ती वाळूज औद्योगिक परिसरातील अनन्या पॉलीप्लास्ट या कंपनीत काम करत होती. दि. २३ जून रोजी सकाळी ९.१५ वाजता नियमितपणे मशीनवर काम करणारी महिला गैरहजर होती. त्यावेळी कंपनीचे मालक दयानंद गिरी यांनी पूजा पांचाळ यांना मशीनचे कोणतेही प्रशिक्षण किंवा ज्ञान नसतानाही मोल्डिंग मशीनवर काम करण्यास लावले.

या दरम्यान पूजा यांचा हात मशीनमध्ये अडकून गंभीर जखमी झाला. तत्काळ तिला उपचारासाठी रुग्णालयात हलवण्यात आले. डॉक्टरांनी उपचारादरम्यान तिचा उजवा हात कोपर्यापासून कापावा लागला.

संपूर्ण उपचारानंतर दि. २५ जुलै रोजी पूजा पांचाळ यांनी वाळूज एमआयडीसी पोलीस ठाण्यात कंपनी मालक दयानंद गिरी यांच्याविरुद्ध तक्रार दाखल केली. पोलिसांनी गुन्हा नोंद करून पुढील तपास सुरू केला आहे.

या घटनेमुळे कामगार सुरक्षेबाबत औद्योगिक क्षेत्रातील बेफिकिरी पुन्हा एकदा समोर आली असून, अशा दुर्घटनांना जबाबदार असणाऱ्या मालकांवर कठोर कारवाईची मागणी होत आहे.