आदर्श सरपंच भास्करराव पेरे पाटील यांच्या विकासनितीतून घडलेल्या आदर्श गाव पाटोदा चा मन की बात मध्ये पंतप्रधान मोदींकडून विकास कार्यांचे कौतुक

Total Views: 44

🔴आदर्श सरपंच भास्करराव पेरे पाटील यांच्या विकासनीतीतून घडलेले आदर्श गाव पाटोदा हरित मॉडेल देशासाठी ठरतेय प्रेरणा🔴

विशेष वृतांकन ( गजानन ल.राऊत )

देशाचे पंतप्रधान नरेंद्र मोदी यांनी ‘मन की बात’ या लोकप्रिय रेडिओ कार्यक्रमात छत्रपती संभाजीनगर जिल्ह्यातील पाटोदा गावाचा उल्लेख करत, गावाने केलेल्या पर्यावरणपूरक आणि समग्र विकास कार्याचे मनापासून कौतुक केले.

पाटोदा ग्रामपंचायतीने अंमलात आणलेल्या नाविन्यपूर्ण उपक्रमांमुळे हे गाव आज संपूर्ण देशासाठी एक आदर्श ठरत आहे. आदर्श सरपंच भास्करराव पेरे पाटील यांच्या दूरदृष्टीपूर्ण आणि विकासाभिमुख धोरणांमुळे पाटोदा गावाने विविध पातळ्यांवर उल्लेखनीय यश संपादन केले आहे.

✅ कार्बन न्यूट्रल गावाच्या दिशेने यशस्वी वाटचाल

आदर्श सरपंच, आदर्श गाव पाटोदा गावचे शिल्पकार तथा विकास पुरुष म्हणून ओळखले जाणारे भास्करराव पेरे पाटील हे सध्या गावाच्या राजकारणात आज जरी सक्रिय नसले तरी त्यांनी गावाच्या विकासासाठी मजबूत केलेली विकासनिती गाव तथा आदर्श ग्रामपंचायत पाटोदा मोठ्या दिमतीने अनुसरतांना दिसते

पाटोदा ग्रामपंचायतीने शाश्वत विकासाचे उद्दिष्ट ठेवून कार्बन उत्सर्जन कमी करण्यासाठी ठोस पावले उचलली. गावाने कार्बन-डाय-ऑक्साइडचे प्रमाण कमी करण्यासाठी पर्यावरणपूरक तंत्रज्ञान, वृक्षलागवड, सौरऊर्जा प्रकल्प, जैविक कचऱ्याचे व्यवस्थापन, प्लास्टिकमुक्त मोहिमा आणि जलसंधारण यासारख्या विविध उपक्रमांवर भर दिला.

याच प्रयत्नांची दखल घेत देशपातळीवरील ‘कार्बन न्यूट्रल गाव’ सन्मानांतर्गत पाटोदा गावाने दुसरा क्रमांक पटकावला आहे. या कामगिरीमुळे पंतप्रधानांनी आपल्या भाषणात थेट पाटोदा गावाचे उदाहरण देत इतर गावांसाठी हे मॉडेल आदर्श असल्याचे नमूद केले.

✅हरित तंत्रज्ञानाचा वापर🌳🌳🌳🌳🌳🌳

गावात सौर पथदीपांची उभारणी, घरगुती व शासकीय इमारतींवर सौर पॅनेल, नैसर्गिक शेतीसाठी जैविक खते वापरणे, शून्य कचरा धोरण, तसेच महिला बचतगटांच्या मदतीने सेंद्रिय उत्पादने तयार करून विक्री अशा अनेक गोष्टींचा अंतर्भाव आहे.

👉पंतप्रधानांकडून थेट उल्लेख – गावकऱ्यांमध्ये आनंदाचे वातावरण

पंतप्रधान नरेंद्र मोदींच्या ‘मन की बात’ कार्यक्रमात पाटोदा गावाच्या उल्लेखानंतर संपूर्ण जिल्ह्यातून कौतुकाचा वर्षाव होत असून गावकऱ्यांमध्ये अभिमानाची लाट उसळली आहे.

गावातील नागरिक, विशेषतः युवा वर्ग आणि महिलांनी ग्रामपंचायतीच्या या उपक्रमांमध्ये सक्रिय सहभाग घेतला.

👉 भविष्यातील दिशा

या यशामुळे पाटोदा गावाला विविध शासकीय योजनांमध्ये प्राधान्य मिळण्याची शक्यता आहे. त्याचबरोबर, राज्यातील इतर ग्रामपंचायतींसाठी पाटोदा हे गाव एक ‘रोल मॉडेल’ ठरत असून हरित, समतोल आणि लोकाभिमुख विकासासाठी प्रेरणास्थान बनले आहे.

अशी ही पाटोदा गावाची विकासगाथा आता दिल्लीपर्यंत पोहोचली असून, ‘मन की बात’मध्ये झालेल्या उल्लेखामुळे संपूर्ण जिल्ह्याचे नाव उज्वल झाले आहे.