लाडक्या बहिणींना दिलासा! लाडकी बहीण योजनेच्या e-KYC ला मुदतवाढ

Total Views: 191

न्यूज मराठवाडा वृत्तसेवा (अभिषेक गावंडे)

न्यूज मराठवाडा वृत्तसेवा (अभिषेक गावंडे)

छत्रपती संभाजीनगर :राज्य शासनाच्या ‘मुख्यमंत्री माझी लाडकी बहीण’ योजनेसाठी e-KYC करण्याची अंतिम तारीख १८ नोव्हेंबर २०२५ ठरवण्यात आली होती. मात्र तांत्रिक अडचणी, वेबसाईटवरील वाढलेला ताण आणि मोठ्या संख्येने महिलांची e-KYC प्रलंबित असल्याने महिला व बाल कल्याण मंत्री अदिती तटकरे यांनी e-KYC ची मुदत ३१ डिसेंबर २०२५ पर्यंत वाढवण्याचा महत्त्वपूर्ण निर्णय जाहीर केला आहे. या निर्णयामुळे लाखो लाभार्थी महिलांना मोठा दिलासा मिळाला आहे.

🌐 शासनाचा मोठा निर्णय

राज्यात गेल्या काही दिवसांत आलेल्या नैसर्गिक आपत्ती व विविध अडचणींमुळे अनेक पात्र महिलांना e-KYC वेळेत पूर्ण करता आली नाही. या परिस्थितीची दखल घेत शासनाने अंतिम मुदत वाढवण्याचा निर्णय घेतला आहे.

📝 पात्र महिलांसाठी विशेष सूचना

ज्या लाभार्थी महिलांचे पती किंवा वडील हयात नाहीत, किंवा घटस्फोट झालेले आहेत त्यांनी—

स्वतःचे e-KYC पूर्ण करावे, मृत्यू प्रमाणपत्र / घटस्फोट प्रमाणपत्र / मा. न्यायालयाचे आदेश यांची सत्यप्रत संबंधित जिल्ह्यातील महिला व बाल विकास अधिकारी यांच्याकडे जमा करावी.

📢 मंत्री अदिती तटकरे यांचे वक्तव्य

‘‘मुख्यमंत्री श्री. देवेंद्र फडणवीस, उपमुख्यमंत्री एकनाथ शिंदे व अजितदादा पवार यांच्या नेतृत्वाखाली ‘लाडकी बहीण’ योजना अत्यंत यशस्वीपणे राबवली जात आहे. अनेक भगिनींच्या अडचणी समजून घेऊन e-KYC ची अंतिम तारीख ३१ डिसेंबरपर्यंत वाढवली आहे. ज्या भगिनींनी अजून e-KYC केलेले नाही, त्यांनी तातडीने ही प्रक्रिया पूर्ण करावी,’’ असे मंत्री तटकरे म्हणाल्या.

या निर्णयामुळे लाभधारकांना योजनेंतर्गत मिळणारा मासिक लाभ अखंडित राहणार असून उर्वरित महिलांना निर्धारित मुदतीत e-KYC पूर्ण करण्याचे आवाहन शासनाकडून करण्यात आले आहे.

॰॰॰॰॰