वाळूज महानगरात महिलेला लुटले तीन चोरट्यांकडून सोन्याच्या दोन चैन हिसकावल्या

न्यूज मराठवाडा वृत्तसेवा/ वाळूज महानगर

सिडको महानगर परिसरात बुधवारी रात्री तिन अनोळखी इसमांनी महिलेला लुटल्याची घटना उघडकीस आली आहे. ओवी कलेक्शन दुकानासमोर ही घटना घडली असून, महिलेकडून तब्बल ₹1.21 लाख किंमतीच्या सोन्याच्या दोन चैन लंपास केल्या गेल्या आहेत.

तक्रारदार सुमन अमरनाथ यादव (वय 42, रा. तिरुपती नगर, जिजाऊ चौक) यांनी एमआयडीसी वाळूज पोलीस ठाण्यात दिलेल्या तक्रारीनुसार, त्या दि. 12 नोव्हेंबर रोजी रात्री साडेआठच्या सुमारास विपुल उपाध्याय यांच्या घरी झालेल्या कार्यक्रमावरून परत येत होत्या. त्याचवेळी काळ्या रंगाच्या मोटारसायकलवर तिन अनोळखी इसम आले आणि त्यातील लालसर शर्ट घातलेल्या इसमाने त्यांच्या गळ्यातील दोन सोन्याच्या चैन हिसकावून पळ काढला.

त्यातील एका चोरट्याने काळा शर्ट, दुसऱ्याने लालसर शर्ट तर मागच्या व्यक्तीने पांढरा शर्ट घातलेला होता. दोघांनी तोंडाला रुमाल बांधलेला होता. या घटनेत सुमन यादव यांच्या 12.10 ग्रॅम आणि 13 ग्रॅम वजनाच्या सोन्याच्या चैन चोरीस गेल्या असून एकूण किंमत ₹1,21,000 इतकी आहे.एमआयडीसी वाळूज पोलिसांनी गुन्हा दाखल करून पुढील तपास सुरू केला आहे.