दरोड्यातील सोन्याच्यादागिन्याने अमोल व त्याच्या बहीणेने काय खरेदी केल? पोलिसांकडून मोठा खुलासा

छत्रपती संभाजीनगर गुन्हे शाखेकडून गुन्ह्यातील मोठी उकल उघड

छत्रपती संभाजीनगर ( न्यूज मराठवाडा ब्युरो रिपोर्ट )

उद्योजक संतोष लड्डा यांच्या घरात १५ मे रोजी झालेल्या दरोड्याप्रकरणी मुख्य सूत्रधार ठरलेला अमोल खोतकर जरी पोलिस चकमकीत ठार झाला असला, तरी त्याच्या गुन्हेगारी कारवायांचे सखोल तपशील आता समोर येत आहेत. विशेष म्हणजे या गुन्ह्यात केवळ अमोलच नाही, तर त्याच्या बहिणी रोहिणी खोतकरचाही सक्रिय सहभाग असल्याचे पुरावे तपासात निष्पन्न झाले आहेत.

९ लाखांचे व्यवहार – बहीणच ठरली लाभार्थी!

दरोड्यानंतर लुटलेल्या मालातून मिळालेल्या पैशातून अमोल खोतकरने पडेगाव परिसरात रेल्वे रुळाजवळील ९ लाख रुपये किमतीचा प्लॉट खरेदी केला होता. विशेष बाब म्हणजे, हा व्यवहार २६ मे रोजी झाला, म्हणजेच त्याच दिवशी जेव्हा अमोलची पोलिस चकमकीत गोळी लागून मृत्यू झाला. या जमिनीचा व्यवहार अमोलने आपली बहीण रोहिणी खोतकर हिच्या नावावर केल्याचे स्पष्ट झाले असून, व्यवहारावेळी अमोल आणि रोहिणीसोबतच अमोलची मैत्रीण खुशी देखील उपस्थित होती.

पोलिस निरीक्षक संभाजी पवार यांनी दिलेल्या माहितीनुसार, या व्यवहारातून उरलेले ९ लाख रुपये रोहिणीच्या पोलिस कोठडीदरम्यान हस्तगत करण्यात आले. यावरून रोहिणीने गुन्ह्यात प्रत्यक्ष सहभागी होत मदत केल्याचे स्पष्ट होते.

अमोलच्या मरणानंतरही व्यवहार रद्द करण्याचा प्रयत्न

दरोड्याप्रकरणात अमोल खोतकर ठार झाल्यानंतर रोहिणीने गोव्यातून परत येताच २३ जून रोजी प्लॉट खरेदीचा व्यवहार रद्द करण्यासाठी मालकाला संपर्क साधला आणि पैसे परत मागितले. यामुळे पोलिसांचा संशय आणखी बळावला आणि २४ जून रोजी रोहिणीला अधिकृतरित्या अटक करण्यात आली.

गोव्यातून प्रेमसंबंध आणि संशयास्पद हालचाली

पोलिस चौकशी सुरू असतानाच रोहिणी १८ जून रोजी गोव्याला रवाना झाली. तिने आपला मोबाइल बंद करून गोव्यातील कॅसिनोमध्ये काम करणाऱ्या रणजीत या मित्राला भेट दिली. रोहिणी आणि रणजीत यांची ओळख ऑक्टोबर २०२४ मध्ये झाली होती आणि २६ जून रोजी दोघांचे लग्न होणार होते. मात्र नियोजित विवाहाच्या दिवशीच रोहिणीची हर्सूल कारागृहात रवानगी झाली.

रणजीतची चौकशी; आणखी खुलासे होण्याची शक्यता

दरम्यान, गुन्हे शाखेच्या दोन पथकांनी गोव्यात जाऊन रणजीतला ताब्यात घेतले असून, शुक्रवारी त्याची कसून चौकशी करण्यात आली. रोहिणीने रणजीतला गुन्ह्याबाबत अनेक गोपनीय माहिती दिल्याचा पोलिसांना संशय आहे. त्यामुळे रणजीतच्या चौकशीतून आणखी धक्कादायक बाबी पुढे येण्याची शक्यता आहे.

आरोपींची संख्या झाली २२ वर

या गुन्ह्यात आतापर्यंत २१ आरोपींना अटक करण्यात आली होती, तर रोहिणीच्या अटकेनंतर ही संख्या २२ वर गेली आहे. यामध्ये अमोलचा साथीदार, मित्र-मैत्रिणी, मालमत्तेच्या व्यवहारात सहभागी व्यक्ती आदींचा समावेश आहे. दरोड्यातून लुटण्यात आलेल्या ५.५ किलो सोनं, ३२ किलो चांदी आणि इतर मौल्यवान वस्तूंचा शोध घेणे सुरू आहे.

गुन्हेगारीला पाठिंबा देणाऱ्या नातेवाईकांवरही कारवाईची मागणी

या प्रकरणातून एक बाब स्पष्ट झाली आहे – गुन्हेगारीतील काही आरोपींचे कुटुंबीयही त्यांचे सहकारी किंवा लाभार्थी ठरत आहेत. त्यामुळे केवळ गुन्हा करणाऱ्यावर नव्हे, तर गुन्ह्याला मूक पाठिंबा देणाऱ्यांवरही कठोर कारवाई होणे आवश्यक आहे, अशी मागणी आता नागरिकांतून होत आहे.

तपास अधिक खोलात गेल्यास या प्रकरणाचे आणखी धागेदोरे उघडकीस येण्याची शक्यता आहे. पोलिसांकडून यापुढे आणखी काही अटकेची शक्यता नाकारता येत नाही.